ფინეთმა საქართველოს 21-წლამდე ნაკრებს პირველი ტაიმი მინიმალური სხვაობით, 24-ე წუთზე გატანილი გოლით მოუგო, თუმცა რამაზ სვანაძის გუნდმა რადიკალურად განსხვავებული მეორე ტაიმი გვიჩვენა: მეტად გააქტიურდა და მომენტების რეალიზაცია შეძლო. აღსანიშნავია, რომ 10 წუთში 3 გოლი გავიტანეთ: 50-ე წუთზე, საკუთარი შანსი ჯერ საბა ხვადაგიანმა გამოიყენა, რასაც 56-ე წუთზე გიზო მამაგეიშვილის გოლი მოჰყვა, 60-ე წუთზე კი საბა მამაცაშვილმა კუთხურიდან ჩაახვია. 68-ე წუთზე ფინეთმა გაიბრძოლა და ერთი ბურთი გაქვითა, თუმცა გოლს, საქართველოს 21-წლამდე ნაკრებმა, გოლით უპასუხა და 88-ე წუთზე, ამჯერად, ფინეთს ოთარ მამაგეიშვილმა გაუტანა.
ამხანაგური მატჩი: ფინეთი 2-4 საქართველო
25 მარტს, საქართველოს 21-წლამდე ნაკრები სერბეთს დაუპირისპირდება. შეხვედრა თბილისის დროით 17:00 საათზეა ჩანიშნული.
აღნიშნული მატჩით, ჩვენი გუნდი ევროპის ჩემპიონატისთვის მზადების პროცესში დაგეგმილი ამხანაგურების ციკლს დაასრულებს.
შეგახსენებთ, რომ 21-წლამდე ნაკრებების ევროპის ჩემპიონატი 2025 წლის 11 ივნისიდან 28 ივნისის ჩათვლით, სლოვაკეთის 8 ქალაქის 8 სტადიონზეა დაგეგმილი. უშუალოდ ჩვენი ნაკრები მატჩებს 8 ქალაქიდან 2-ში: პოლონეთისა (11ივნისი) და საფრანგეთის (14 ივნისი) წინააღმდეგ - ჟილინაში, ხოლო პორტუგალიის (17 ივნისი) წინააღმდეგ - ტრენჩინში გამართავს.
⭕შენიშვნა: მასალა შეიცავს საქართველოს ფეხბურთის ფედერაციის ფოტოს
